Ze invenzion, le biziclete! Se al martiel ai ven dit "il pari di ducj i lavôrs" da biziclete si podares ben disi ch'a è "le mari da machinis". Inventade dai franzês intal 1790, tancj di nun o varin vût ocasion di viodi i prins modei inta fotos o al museo: argagns di parî ridicui, cumò. Ziart che di strade a 'nd à fate il "celerifero", cussì lu clamavin, che nol ocôr nancje cjacarâ. Baste dome viodi chês modêrnis, issint une biele cumuditât, massime cul partepacs, e à cjapât subit pît. Imparâ a lâ nol ere fazil come cumò, si capis, zênze piricul di colâ o di cjapâ sot un cjan. E po' e à simpri costât, le biziclete. E mantignîle, massime intai agns dal boom, e di ziarts governos. Frens a puest (pi che just), fanâl ch'al ves mandât lûs, il catarifrangjent (le rosete fissade sul parafango daûr) e, soredut, jessi in regule cul bol. Vâl a dî le tasse su le zircolazion. Bol di comprâ ogni an ancje par une bizi di seconde man. E fâ il furbo nol cunvignive: cui ch'al vignive brincât zênze, le paiave cjare. In pì, al presit di che fasse di luminio marcade, fissade su le aste sot il manuvri, al veve di paiâ une multe pluitost salade: 10,10 (dîs francs e altretant zentesins), une zifre di pensâ dôs vôtis prime di viazâ zênze chel "danât di un bol". Insome, cumuditât e velozitât a' nd à vût un presit. Par chel, a pi di un, no i leve ju che "tassate", come a Jacum, un om anzianut e dibessôl al mont ch'al veve une, pi che âtri par lâ a spiulâ, a taiâ un pu' di arbute pai cunîns o par partâsi cjase, cjaminant, une fassinùte di lens poiade sul manuvri e su le siele. Al passave simpri pa stradutis fûr man e, conche al scugnive, prime di tressâ li' stradis impuartantis se al lampave un vigjil, par no intopâsi al leve daûr di un sterp ..........fasint fente di pissâ e spetant che si slontani. Par un biel pûc i à lade slisse, fin conche une clipùte sere di primevere... tornant come al solit dai cjamps un puliziot forest, a diferênze dal nostran ch'al zirave il cjâf par no nacuarzisi, cuntune sivilade lu à fermât: "alt! Siamo in qua con il bollo?". Jacum al à zirît di fâ il "mone": "ma... jo, sior... ma le an regalade, le biziclete... si, insome, par cuatri gjalinis...". Ma nol è stât nuie ze fa. L'agjent in divise, adet a fâ rispetâ li' ordenânzis ministeriâls, codiz zivîl ae man, al veve dit: "avendo voi violato la legge dello stato, frodandolo, siete in contravvenzione!". Un brut colp par Jacum. Le multe ch'al à scugnût paiâ i veve ruvinât li' fiestis di Pâsche: in ta sachete ji erin restadis dome cualchi palânche. "poben o cjolarin il bol" e rasonavin i zovins che i plaseve une vorone le biziclete. "Ciaval d'azâr". Ancje cussì al vignive clamât il simbul da modernitât a do' zidulis che par un fantat al ere il massimo. Ze di miôr le domenie di sintât su le siele a schene drete e cjâf alt pedalâ planc planc su e ju pal paîs zirant di ca e di là i vûi par viodi se li frutatis lu rimirin? E no dome chês da sô contrade. Cun tant maraveôs, veloz miez si podeve lâ a viodi âtris paîs, cucâ âtris fantatis... però, prime di fermâsi a cjacarâ cun chistis ultimis bisugnave pensâ do' vôtis, miôr se trê. Lui al fos lât fûr dal semenât, vâl a disi fasintsi viodi plui di une vôte fer a fevelâ cuntune zovine, massime se biele (ma li' fantatis e son dutis bielis, nininis), al riscjave fuart. No sares lade slisse a lunc: i fantaz dal puest, tanche se vessin vût di difindi un lûr "riservât dominio" e varessin dade une lezion di chês a chel "bulo" forest. Dopo vî sbusât li' cjamaredaris, cjapât pa codope, par molâi ju cròchis fin a fâi vignî sanc di nâs, lu visavin: "no stâ fâti plui viodi, chenti". Erino salvadis e barbars i furlans, alore: ma no, ma no, e arin sôl usanzîs, che però e fasevin passâ le voe al zovin di lâ a morosis fûr dal so paîs che, come le arbe di chêi dongje, ch'a è plui verde e plui frescje, cussì li' fantatis e son miôr. Sicome il mont al ere cussì, e son stâz vônde rârs i matrimonis interpaesans. Ma i timps planc a planc e stavin gambiant parvìe che si movevisi di plui, ancje par merit da biziclete, e il "medioevâl" môt di jessi al leve dismetintsi. Però, prime che une fantate e un zovin fra lûr forescj e vessin podût cjôsi par compagns da vite zênze cori pirìcui, da bande di lui, di becâsi un "bon orzo", al à fat in timp a zuzzedi un fat par nuie zivîl, vìtime un zovin di un paîs da basse, che le à vude losche, ma pi che âtri un bon displasê par chel che i à capitât. Chel, al ere Berto, di famèe siorute, pluitost grassùt. Muse di passût intun cjâf rotont di lune plene, vûi grîs di gjat, nâs scrafeât, cu le bocje lârgje e sutìle tanche le frissure da musìne che, conche le viarzeve, al pareve ch'a ridès. "L'identichit" dal zovin si complete disìnt ch'al tignive i cjavêi nerissims e lìs, cu le rie intal miez, taiâz a le "Umbêrte": tant di mode inche vôte. Une muse come "une caricature" si podares disi, ma in maniere simpatiche, dut somât. Ni biele ni brute, rindude miôr dal piz, une biele barbe nêre e fisse che s'a le lassave cressi fin a dîs, dodis centimetros: i plaseve tant che mai l'onôr dal barbuz e s'al tignive a puest al massim. Dutis li' matinis al taiave vie il pilùt fûr puest, lu petenave, lu lissave e... s'al rimirave content di jessi lui il paron di tante bielezze. Dôs altris rubis i plasevin al zovin: il vistîsi 'legant e li' bizicletis. Dât ch'al podeve permètisalis, a 'nd veve trê, e dutis da miôrs marche. "L'hobbi dal fantat al ere il bal, e nol lassave piardi nissune ocasion conche si tratave di lâ a fâ "cuatri salz". Daspò deventât bravissim al ere nomenât tanche il "Fred Astaire dal Friûl", o ancje "Berto Biziclete". Sul finî di un astât, une sabide di sere insieme cun sie trê compagns, al è lât ae sagre intun paisut no tant lontan dulà che, come scrit sui manifescj: "ci saranno due giorni di grandi festeggiamenti". Sichè, lassât le bizi intal parchegjo, tanche i sie amîs, che no bazilavin pi di tant cul taolaz, e son lâz a divirtîsi là dal tirassegno e in gjostre. Lui, il nestri zovin, al è lât dret indulà ch'al ere il breâr. Daspò cualchi moment, lât dongje une fantate ch'e steve fevelant cun sô mari, i à domandât se ureve balâ: "Si" a 'nd à rispundût le zovine. Duncje, comprât un blucùt di biliez da bande dal "cavaliêr", e son entrâz inta piste inzerade. Dal moment che le fantate si lassave partâ ben e si son cjatâz subit cui pas, i doi e sgurlavin ch'al ere un plasê viodiju. Si è divirtût tant che mai il zovin, inche serade. Par chist "...o tornarai ancje doman di sere -al à promitût ae "partner"- le int a è simpatiche e li' fiestis e vegnin fûr propi ben in chist paîs". Difat cussì al à fat. Spandût un pu' di gotis di bonodôr sul cuel da gjachete e su le cjamêse di sede blâncje, il dì daspò, simpri cui sie amîs, Berto al è tornât intal paîs indulà che li' fiestis e riessin benon; par balâ, si capìs, ma le sô balarine no le viôt. "Saraial masse bonore" al pense. Alore, seben si fossin mitûz dacordo di "cjatâsi chi", al è lât a zirîle un pâr di vôtis ator il taolàz. Ma nuie, le fantate no le viôt. "Paziênze, e rivarà ben, e rivarà...", fin conche, se nol è, i son lâz dongje tre zovins. "Mandi -i dîs un- saial che lui, jersere, al à dimostrât di jessi un grant balarin, pecjât che cui ch'a è degne da sô famèe no è ancjemò vignude fûr: no le varae stracade masse cunducj i valzers , li' mazùrchis e staiaris". "Ma no -al salte fûr un altri- a 'nd an int a zene, une caretade di parincj di fûr vignûz a le sagre: magari e sarà daûr a lavâ i plaz: e rivarà un pu' pi tart!". "Tant che o spietìn -al propon il tiarz- ch'al vegni cun nun a bevi un taiut, zovin, o pâi jo, però". Inta ostarie, dopo vî disvuedade le tazzute "Fred Astaire" nol à pudût fâ dimancul di disi: "Fantaz, cumò al tocje a mi vî il plasê di ufrî. Paron, il bis, par plasê!". Ta une glutade e chê âtre par mandâ jù il blanc cualchidun al à domandât al forest "d'indulà ch'al è". "O soi di C..." al à rispundût l'ospit. "Ah, o soi stât par afârs pì di une vôte, brave int i C..., cumplimenz". "Si, si a è vere -al conferme chel da clape cu li' moschètis, ma no sarajo migo di mancul jo: cuatri bicjirins di sgnàpe cu le mênte, sior Toni!". No è finide. 'Pene fat fûr i "grigioverde" il tiarz socio dai sorestanz al à comandât cuatri bocâi di bire. "Al scomênze a fâ cjalt, chi". "Che le bevi, zovin, che le bevi, finché a è frêscje, al balarâ miôr, dopo...". Ma fate lâ intai budiei ancje chê bevande scuasi glazzade, a Berto i an scomenzât a balâ ator i aventôrs dal bar, li' cjadreis, i taulins... fasint in timp a sintî prime di colâ par tiare, un rumurut, une specie di: "zsciac". Un cuardore pi tart i sie amîs entrâz intal locâl public a cjôsi un gjelato, lu an lampât intun cjanton, sintât su un scagnùt, sturnît, cun poiât su le taule un braz e un musiel, vûi bumbîz e lusinz pal sudôr; alore, cjapât sù di pês a 'nd an cjariât il zovin, ch'al veve simpri il cjâf e i cjavêi a pendolòn, su le cane di une biziclete, lu an menât cjase e mitût intal jet. "Fred Astaire" si à remenât dute le gnot intai linzôi dismuvintsi daspès pal mâl di cjâf. E intun cjâf che i pareve un balon, cunfusionât, a momenz ai vignive di visâsi da "sô" simpatiche, graziôse, brave compagne di bal che par une serade, insieme, e son stâz une biele copie. E cul zarviel come s'al fos plen di une pênze fumate al zirive di capî parzeche no si son cjatâz le seconde sere; e soredut ze che i veve capitât prime di chel "zsciac" finâl... ormai a è matine târde. Al à sêt, si passe une man sul zarnêli, i pìzzin i vûi. Si carezze i lâvris screpolâz da arsure, si palpe il piz... che nol è. Di scat si jeve in sintòn e al taste un'âtre vôte il barbuz: al mole un urlòn e di côrse al va in bagno a cjalâsi intal spieli. Chel al riflet un cjâf a miluz, cun doi vûi sglonfs pa sun e... zênze piz! Al so puest al viôt une spezie di scovét fruiât. Cumò al veve capît il mutîf dal rumurùt: cundun colpàt di fuarfàtis jal vevin tazzât scuasi dut. Alore cul rasôr si taje il zuncugn di scovét fin a fîl da piel. Pal displasê nol à podût fâ di mancul di mandâ cun rabie ai responsabii di tant "sempio" trê peraolàtis: "Vàndai!, bifolcs!, viliacs!". Ma zaromai a è fate. "Paziênze" al pênse, tra un trê agns al sarà come prime il me "onôr di mento". Ziart, un bon displasê. E cumò zênze il piz ch'a i slungjave le muse, il cjâf di lune plene i semeave ch'al fos pi rotont. Intant, zênze che si nacurzessin, dai vûi dal zovin si erin stacadis do' lagrimis, che dopo vî riât le musòne e son ladis a finîle intal barzùz, propi indulà che, fin a le sere prime al ere tacât un dai plui biêi piz dal Bas Friûl. Ziart un grant brut dispiét rizivût da bande di zovins maleducâz. O dome parzeche a erino gjelôs da "lûr" fantazzinis? Ma!... Par intant, cumò, a Berto le sô muse i pareve une cualuncue, vuede: Come se il Sindic di Sanzòrz si fos insumiât che Plazze Berto Prin e fos zênze munizzipi e li' tacàdi' scueli' elementârs. Un minizzipi tant biel che mai pa le so preseade linie architetoniche. Un palaz munizipâl tignût tant cont di parî gnôf, e ch'al da un tono a le zone, fasint emplâ di orgolio ducj i sanzurzins. Poben, Berto, ze âtu di fa mo', paziênze, e tra un trê agns il piz, che tant ti done, ancje se ti fâs parî un pu' pi vecjo, ti sarà tornât lunc come chel di prime. Une specie di coni di pêi che tu lu staronzarâs in ponte e tu tal lassarâs lunc pi che mai. Tancj auguris, zovin. Mandi. Come che si viôt si è tratât di un pizzul fat di cronache mitût dongje in dute fede e veretât, aben se a sclop ritardât, dal moment che al è zuzzidût cualchi an prime da seconde vuere mondiâl. Ancje par colpe di do' zidulis!

Milan, mês di mai, l'ultin prin dal doimîl - furlan al è biel.