Per leggere il testo completo della ricerca clicca sul logo:

Intant dai studis di antropologjie che o fasìn ca e là pai paîs de Basse, a Muzane o ai cjatât cheste conte semplice e biele che o riten degne di sei cognossude. La grafie e rispiete la varietât furlanofone di Muzane pûr doprant, fin la che al è pussibil, chê normalizade.

A jerin ator dai agns '30 e inta chei timps mê pari al faseve el contadin, dute le sô famee e ancje jo. Le cjase, in font di vie dal Municipi, a Muzane, a jere dilunc sù dute di me pari, nô?… e là a vevin el stalon, grant, che al è ancjemò.
E alore, si veve li' vacjis, si faseve tant formadi, daspès, e tant butîr, ancje, no?… E, cjô, nissun al vendeve… miserie nere inchê volte!… Nissun al veve bêzs par comprâ une forme di formadi o un chilo di butîr. Insome mê pari al faseve disfâ chist butîr e lu meteve vie. Ma, cjô, tant, tant, bisugnave fâlu fôr, no?… e alore mê pari Vicenz une dì mi dîs:
"Berto, va a vendi el butîr". …Stecjis di butîr par ca! ma rube naturâl, cjô… butîr di chel che al saveve di butîr… miga come chel ch'e vendin vuê che nol sa di nuie!
Alore mi dîs di lâ a vendi el butîr a Maran, e no vevi nancje le biciclete.
Alore al jere un, chi, che al faseve di vuardian, el "messo comunâl": chel che al fâs i servizis pal cumun, no?… Si clamave Otorino e al veve une biciclete di bersaliêr cu li' gomi' duris. Inchê volte al veve dome lui le biciclete…
Alore, jo, mi pensi e voi a viodi se mi preste le biciclete. E jo a vevi juste un partepacs di biciclete. Si viôt che a vevin za vude une biciclete, cjase mê, che dopo si viôt che si è rote, …sao jo?… Alore voi a domandâi, e ma le preste. Alore, jo, …content come une pasche!

(segue)