Per leggere il testo completo clicca sul logo seguente:

A man çampe dal flum Cuar la antighe borgade di Cjarisà, al dì di vuê frazion di Sant Zorç di Noiâr, ma une volte sede comunâl a sé stant (1), si divît in doi rams principâi. Un si cjate a jessi su la strade statâl numar 14, Triest-Vignesie, clamade ancje "Triestine", chel altri si lu cjate intal prin toc de antighe strade che di Cjarisà si indreçave bande Udin.
Intal prin ram lis cjasis a son mancul vieris, invecit in cheste seconde vie di comunicazion, vuê taiade fûr dai modernis percors che a menin ae capitâl dal Friûl, lis sôs cjasis e lis andronis esistentis a son cussì vieris che la memorie si piert intes penzis fumatis dal timp.
Une volte cheste seconde strade, avonde basse forsi par vie che fin a Porpêt si dreçave costegjant il flum Cuar, i paesans di Cjarisà e Porpêt popolarmentri la clamavin, apont, la "Strade Basse": vuê a Cjarisà e in dut il comun di Sant Zorç si le clame, invecit, Vie Cjarisà (Via Chiarisacco).
Partint de strade Statâl 14 lant viars Porpêt, alore, inte part çampe de strade daspò passade la Place de Pômpe (Piazza della fontana), o cjatìn la Androne dai Rosâris (sorenom di un ram de antighe famee dai Taverna). La carataristiche di cheste Androne, oltri al fat di sei sierade dulintôr di cjasis e stalis, e je che il grant curtîl al à la tendince di lâ pluitost di rive jù viars il flum che al passe lì dongje. Plui indevant, al dret di un volt a comedòn de strade, o cjatìn la Androne dai Zavatîns (cu la zete sorde), sorenon de famèe Turchetti.
Simpri partint de strade statâl, alore inte part drete di vie Cjarisà, oltri ae Androne dai Tavêrnis, che e je plui indevant e che la trascurìn pe pucje curiositât che nus trasmet, daspò di une viuce strete strete, clamade il Fossalàt, par vie che une volte al jere pardabon un fossalat di scolo, e je subit lì la Androne dai Marâns (o plui modernamentri clamade "dai Culuîns"), cognons di antighis fameis di lenti.

(segue)