Li' popolazions dal Friûl, in special mût chês dai paîs da basse furlane, par vie da profonde devo-zion e venerazion ch'e àn pa Madone, par continuâ une consuetudine tradizionâl vuê, il 20 di avost dal an 2000, jo e Marie, la mê femine, o sin lâts a Barbane partezipant a un piligrinagjo inmaneât dai fedêi dal paîs di Malisane. Chist par nun, paesans di Sanzòrz, nol è un fat usuâl, ma o vin aprofi-tât da ocasion che si è presentade par vie dal benevul "placet" cunzidût dal plevan di chel paîs. Pre Oreste Zorzenon, cul so particolâr e plasevul mût di fâ, nus à prime invoiât e podopo pirmitût di partezipâ a chiste zornade religjôse in viste da tradizionâl fieste da Madone che, di lì a pûc, lûr a va-ressin festegjât tal so paîs. Fieste che si ripet ogni an, di agnorums, e ch'e regjistre le partezipazion no sôl di dute le comunitât di chê frazion, ma ancje le grant part di chei dal Tôr e dai paîs lì dulintôr. Ancje di Porpêt e Palme. Il piliginagjo al è stât fat cu le coriere, plene fin che si podeve stâ di oms, feminis e fruts e, man a man che si svizinavin a Grau par imbarcjâsi su di un "vaporet", che podopo nus vares partât a Bar-bane, il plevan, cu le so vôs potente, ma intonade, al tacave a cjantâ e al continuave zênze padìn a intonâ cjants a pro da Virgjine Marie che si stave lant a cjatâ. Par me, om di pucje fede, che no jeri mai stât a un cualsisei piligrinagjo religjôs, e je stade une biele esperiênze. O vevi partezipât, si, a cualchi riunion nazionâl di alpins, ancje chel considerât piligrina-gjo nezessariamentri laic, ma no vevi cjatât une "atmosfere" compagne. Si cjantave tant ancje là, ma cjants di montagne e militariscj, culì i umins prisints, ma soredut li' feminis, ducj sustignûts da vôs di pre Oreste, e cjantavin cjants di glesie cun ispirazion a le Madone. E par furlan!! Une grande e biele sensazion. Rivâts a Grau, daspò vî inforcjade le borse a tracuel, si sin imbarcjâts par lâ inta chê isule dulà che je le glesie da Beade Virgjine Marie, lôc di piligrinagjo, apont, di dute le popolazion religjôse da Basse Furlane, e no sôl, dulà che e po' cjatâ confuart, e daspès ancje grazie, a malans e inzidents: brutis cjossis ch'e podin capitâ intal cors di une vite. Drenti da Glesie, su li' parêts, difat si podin viodi disens e figuris di personis, bestiis e cjossis che, par interzession da Madone di Barbane si son salvadis intant di cualchi brut inzident; o ch'e àn vût mitigât li' penis di greviis malatiis o ch'e àn utignût une improbabil, ma subitanee guarigjon; e v.i.. Ancje il fat zuzidût a di un di Sanzòrz si viôt culì picjât intune parêt. Al à rizivude le grazie di vî salve le vite dopo vî patît un grevissim inzident sul lavôr. Eco cà ch'o spieghi il fat. Elvio Colautti di 46 agns, e Giancarlo Zanon di 31, inta chê matine dal 1987 a vevin apene scomen-zât a lavorâ intal puart gnôf da zone industriâl di Sanzòrz, e par Gjancarli e are le prime dì di vôre. E lavoravin par sore di une armadure, a sô vôte mitude sù sul prin plan di un grant splaz in fiar: une struture grandonone, fate sù su doi plans che e veve di servî par lâ a gjavâ petrolio intal miez dal mâr. Chê struture e are âlte di plui di 20 metros e lûr a vevin di saldâ scuasi là in zime, sot le cuviâr-te. Forsi par cause di un grant colp di aiar, prime das nûf, le armadure, ch'e are sistemade a scuasi 20 metros di altèze, si è spostade di brut e e à fat colâ jù i doi saldadôrs. Gjancarli Zanon al è colât jù cu le schene e, magari cussì no, al è muart sul colp. Elvio Colaut, invezi, zigant al è colât sul prin plan di chê struture. Si viôt che in cualchi maniere, e par un toc, Elvio al veve rivât a tignîsi sù di cualchi bande, ma a le fin, colât jù ancje lui si veve fat tant mâl. Partât a Palme, i miedis e vevin de-clarât che al jere restât muart trê vôtis sot operazion. In dut sot i fiars al veve stât plui di nûf oris. L'avôt lu veve fat sô mari, puare Rose Zaine, ch'e are avodade a le Madone di Barbane za di agns, ch'e are restade vedue. I e lave ancje dôs o trê vôtis al an in piligrinagjo a Barbane. Dopo colât so fi e are lade subit a fâ un âtri. Cumò, Elvio, ancje s'e son passâts plui di tredis agns al è simpri plen di dolôrs, ma al è ancjemò cà. Montâts ducj sul vaporet o vin ocupât ogni un il so puest e o sin partîts scuasi subit, par vie che ducj i zincuante e passe piligrins da coriere e àn jemplade le bârcje. Nancje partîts pre Oreste, dacuardi cu li' feminis, al veve tacât subit a cjantâ e ancje i oms a rispundevin ben. Jo no savêvi nissune di chês melodiis. No podêvi metimi a cjantâ "La montanara" o "Quel mazzolin di fiori"; e nancje "Ste-lutis alpinis" dal moment che o sares stât, come che si use disi: "fûr di scuare". Alore o scoltâvi e o tasêvi. Jo o ari un dai prins che si veve imbarcjât e, par chel, mi vêvi cjatât a jessi sintât dongje dal guida-dôr. Dai barcognuts viarts e jentrave une bavisèle picânte, profumade di sals, di scraz , di canèlis e di pantan: odôrs tìpics da lagune che ti jemplin no sôl i polmons, ma ancje il spirt. In mût speziâl a mi che, fin di pìzul, o jeri stât tirât sù daprûf le lagune. Tal pantan da lagune si lave a pescjâ cu li' mans (si dîs palmonâ) passarìns e gût; inta aris si cjapave gjavedon, pes nono e schilis, e par dut si sintive chel odôr di canèle e pantàn. Il ricuart di chei odôrs definîts "puars", par me e restaran simpri ma-raveôs. Ancje cuant che in realtât no ju sint, tal ricuart mi compagnin e mi compagnaran cun plasê par dute le vite. Daspò partîts li' feminis e vevin scomenzât a lamentâsi ch'e sintivin frêt, e lu vevin ancje mutigât al marinâr, ma chel al veve fat fênte di no sintî. Par sot, però, al veve mugugnât alc cuintri di lûr. Intant che il potent coro dulà che le vôs di pre Oreste e imperave, tra svoi di cocâi e jevadis sburidis di garzètis impauridis dal rumôr da bârcje che, cul so motôr al interompève chel zidinôr di aghe cuiete, il paesagjo lagunâr al passave lent sot dai nestris vûi inzeâts di un soreli ancjemò bas, ma firbint. A un ziart moment intune vaste plane fangose, no tant lontan dal canâl dulà che o stavin via-zant, une femine e à viudût dôs o trê crôs di len plantadis tal pantan. Chê femine, pi che âtri cjapade di un brut presentiment pluitost che di une forme di curiosetât, si è jevade sù e, preocupade, e à do-mandât al conducent da bârcje: "Mi scusi, mi sa dire perché ci sono quelle croci?". Si viôt che chel marinâr no le veve tant cui "furlani", ancje se par fuarze di rubis al podeve stâ content di chei pili-grins che lui al stave partant: furlans o no, i permetevin di lavorâ e i rindevin par fuarze di cjossis cualchi francut. A chê femine i veve rispundût a sec: "Tre caciatori i xe morti de fredo!...". Chê fe-mine, forsi spietantsi une spiegazion plui esauriente, che no je vignude, par un moment e à spietât, po' mi à cjalât e, zenze disi nuie, je tornade tal so puest. Man a man ch'e lavin dilunc le nestre mete si faseve simpri plui dongje e il blanc da basiliche e ri-saltave simpri di plui tal miez dal vert dai arbui da isule finché, rivâts, si vin poiâts sul molo dal puartut di Barbane. Secont le tradizion le isule di Barbane e le sô glesie e àn origjinis antichissimis tant di sedi vuluzà-dis intun zercli velât di misteri. Il santuari dediât a le Madone al pararès che al sedi stât fat sù dal patriarcje di Aquilèe Elia, intal VI secul daspò Crist, intal stes puest dulà che dai pescjadôrs, dopo di une gran brute tampieste, su le isule e vevin cjatade une misteriose statue di Madone. Il toponim Barbane invezi al ven da Barbano, il nom dal prin frari rivât intal convent, chist ultim custruît subit dopo, daprûf da prime glisiute. Dut chist si lu sa par sintût a dî, parzè che no son documents che confêrmin le tradizion. Le glesie da Beade Virgjine di Barbane, insieme a Madone di Mont (o Cja-stiel di Mont) poiât chist ultim parsore Cividât in comun di Prepot, al è il plui antîc santuari dal Friûl e si cjate intune isulute drenti ta lagune di Grau. Il santuari al è stât rifat intal XVIII secul, e al è stât consacrât intal 1738. Il servizi dal convent che prime, a partî dal X sec. al vignive fat dai Be-nedetins, daspò al è stât dât ai fraris Conventuâi Francescans a scomenzâ da seconde metât dal '400, ma intal 1768, in seguit a une lez veneziane e àn scugnût bandonâ le isule. Le lez e diseve di gjavâ vie ducj chei convents che no rivavin a vî almancul dodis religjôs. Sôl a partî dal 1851 i fraris a son tornâts a stâ tal stes convent di vuê. Le glesie che nun cumò o podìn jodi, e rimirâ, e je stade rifate a scomenzâ dal 1911 e e je stade finude intal 1924. Al è dinchê volte che le "modêrne" tradizion da nestre int e à scomenzât a pirigrinâ inta isule par amôr da Madone. A Malisane, secont i vecjos di chel paîs, in prinzipi e lavin in barcje. Si imbarcjavin là jù sul Ause e a partivin dal puartut da Baiane, ma podopo, cuant che e je stade custruide le strade di Grau e il punt sul canâl, e lavin cul cjar tirât dai bôs o dai cjavai. Sôl in ete plui modêrne si à scomenzât a lâ cu le coriere. Ancje a Sanzòrz le partecipazion ai piligrinagjos e are grânde, e, par vî une ideie plui clare di zemût che si svolzevin i viazs, di dulà ch'e partivin e v.i., o ai domandât a Guido Zaine, paesan da classe 1925, un siôr che al à vivût une vite religjose siguramentri plui intense da mê e, par chel, ben plui degne di sevi contade e crodude. Poben, stant a lis indicazions di Guido ."le int di Sanzòrz d'imprìn e lave in piligrinagjo a Barba-ne cun fede, no come cumò. magari cundune fete di polênte sot il braz e lavin fin a Maran, magari o cui cjavai, che ti menavin, là.no?. e po' e cjapavin le bârcje: un caìcjo, e e lavin jù a rems fin a Barbane, une bârcje daûr chê âtre. Li' bârcjis no arin come chês di vuê, taponadis, ma si lave vie cu le ombrene sot il braz: s'al ploveve tu ti paravis, e se no tu vevis di cjapâle dute!. E lì si preiè-ve di cuant ch'e tu partivis fin cuant che tu tornavis. Preâ e cjantâ, preâ e cjantâ.Chê e are fede vere!". E dopo, cuant che, alore, su le marine par Grau a vevin fate le strade e il punt zirevul, par lâ a Bar-bane si lave fin a Grau cui cjavai. Ancje in biziclete chei vodâts a le Madone e lavin fin a Grau!, E dopo, là e cjapavin le batele dai Graulês.Alore dopo, cuant che li' bârcjis dai marinârs sanzurzins e vevin il motôr, che alore e arin bieli' grândis, ma ancje cun chês a vele, chei di Sanzòrz e partivin par Barbane dal puart di Noiâr, che inche volte al esisteve nome chel vecjo. E lavin cu le bârcje dai Cócui, dai Fornèze, dai Manzâns. ma ancje cun altris. E alore chei di Grau no orevin che tu lassis cu le bârcje, parché e arin lûr i adets al traspuart da int. e alore, a cause di chist fat. daspès il punt zirevul no si viarzeve! Li' bârcjis grandis che e vignivin di Sanzòrz e dovevin cjatâsi as dîs di matine devant il punt mobil di Grau, ch'al are il guardian che lu viarzeve. Al fermave il trafic des machinis e al faseve passâ lis barcjis: chês pìzulis e podevin passâ par sot, ma chê' grândis no! "E une vôte ch'e arin cun pre Gjani -al cônte sior Guido- o sin rivâts in ritart e il punt lu vin cjatât siarât e o sin restâts di cà. E alore jo, pre Gjani e un âtri, o sin lâts a zirî il guardian, ma chel nol si veve fat cjatâ a cjase: e arin dusinte personis su le bârcje ch'e spietavin. Secont il plan che a vevin architetât il guardian e i trasportadôrs di piligrins, chês dusinte personis e varessin scugnût sbar-cjâ lì, a Grau: li varessin partadis lûr cu lis sie bârcjis a Barbane e cussì e varessin cjapât un biel francut. E alore nun, che o vin capît, o sin tornâts indaûr e o sin lâts a mangjâ inta isulis ch'e son lì, in ma-rine. E cuant che il soreli al jere ancjemò alt si sin inviâts viars cjase e o vin fate le Messe ta glesie di Noiâr come s'e fossin stâts ta chê di Barbane". Tornant a nuâtris, daspò vî spassegjât ator da isule -cun visite a le capele, fate sù intal 1858 intal stes puest dulà che al esisteve l'olm che, tra i sie ramazs i pescjadôrs d'inchê volte e vevin cjatade le statue da Madone- tra cjants e Messis o vin ancje, come che si dîs vuê, "socializât" tra piligrins. Le zornade di fede e je lade indenant fin tal daspò misdì, cuant che un vaporèt al è vignût a cjoinus e nus à tornâts a partâ indaûr. Pre Oreste cu le solite passionalitât al veve tacât a cjantâ e a dirizi i cjants da feminis che si scomenzave zaromai a sintî ch'e vevin li' vôs strachis. Ma ancje le sô, però, e scomenzave a piardi di potênze. Dopo, al è stât par plui di une setemane grucj. Une vôte propi par tradizion, ma soredut parzè che e are miserie, il mangjâ si lu partave vie di cjase, ma chiste volte le grant part dai piligrins e vevin mangjât inta mense dal convent (che in pratiche al è il ristorant da isule). Cun nun e vevin une fameie inglêse, (i Stevenson di Londre), che ogni an in astât e vegnin a tignî companìe a le none, mari e madone: siore Nesta. Foto n.5Une storiche imagjine di un piligrinagjo a Barbane cun partênze dal puart vecjo di Noiâr. Purtrop no si sa ni date ni altris particolârs (Foto archivio Ad Undecimum). Ducj insieme o vin scuviart no sôl un biel lûc turistic, ma ancje e soredut un clâr punt di riferiment di fede, e no sôl par nun cristians dal Friûl, che nus à culpît e fat rifleti su lis nestris debolèzis: un aiût, chist, par podê frontâ cun plui serenitât l'avignî. Un agrât a pre Oreste e a Rinaldo Dell'Ominut che nus àn dât le pussibilitât di testemoniâ un cussì impuartant at di fede e, tal stes timp, passâ une biele zornade in companie di personis semplicis e educadis.