Mandi, polênte e... frutazàdis Baste cognossi ogni pûc le storie par savî che il Friûl, tiare di cunfin, massime intal passât al è simpri stât tiare di vueris, e di passaz di esercits, ch'e vignivin a invadi l'Italie. Par chel e son simpri stâts tancj i soldâts mandâts chenti a preparâsi par difindi le patrie. Dal rest, da nestri' bândis i forescj no son mai mancjâts: dai mêstris ai garbinêrs, dai finanziots ai afariscj. Poben, dute chiste int ch'e vignive di fûr li' primis trê peraulis ch'e imparavin e arin "mandi", "polênte" e "fruts". Tanche in altris bandis da penisule le frutarìe e zuiave di mafie e di copâsi, culì si divertivin a fâ fênte di jessi in vuere a cumbinâ e fâsi dispiets. A scuele, po'... baste un câs par ducj. Tanche in duti' li' aulis dal mont i scuelârs pi di stâ atents a le lezion a 'nd an miôr tirâsi gòmis di scanzelâ, aeroplanùz di cjârte e ze tant âtri, ma chei da IV b masculine di san Zorz e arin esagjerâts. E stevin atents, si a ze ch'al spiegave il mêstri, e a imparavin le puisie di Pascoli a memorie e ancje cui ch'al ere stât il tiarz re di Rome, ma i plaseve unevûre di plui straviâsi fin a lâ fûr dal lezit, come inchê vôte... (disegn)Hallo! - Mandi! Salûts che a son simpri modernis. Pai ultins mês di scuele di un an scuelâstic tra i agns '30 e '40, inta lûr classe e vevin mandât tanche suplênte une zovine mistrute mandade di une zitât no lontan dal Friûl. E are timidute le gnove insegnânte e a veve un bon "zif e zaf" a parâsi di chês "belvutis". L'unic svindìc da suplênte al ere chel di cjariâ i fruts di cômpits par cjase e condanâju a scrivi sul cuaderno 100 vôtis: "Sto poco attento alle lezioni". Doi di lûr, Mario e Vitorio, tra i pì ribêi un lunis di matine e son rivâts in classe un, cuntune scjatulute di pàtine cun dentri doi grivons che i veve gjavât le spine; e chel âtri cundune bôrse di carton, un fagot plen di busùtis cun leâts i cuatri pics, par tignî siarât un madracut ch'al scozàve , che lu veve brincât inta sere prime. Sichè, tor li' dîs, i scuelârs e chê "strie di mêstre" che, daspò vî insegnât zemôt si fâs le prove dal nûf, passade al libri di Collodi e stave disegnant su le lavagne Pinòchio, par po' domandâ se cualchidun al sa il parzè che al pipinòt di len il nâs i devênte simpri pì lunc, e sintin: "Zzzzz... zzzzz..." dai doi grivons lassâts lâ di Mario che, sturnîts, ronzant e levin a sbati intai mûrs e cuintri i veris dai barcôns. Le mêstre maraveade e un pu' spauride: "Ma par dulà sarano jentrâts i piriculôs insets?!". A je lade sburide a viârzi un barcon par che i doi grivons e ledin fûr. Se nol è, tornant a le lavagne ti lampe dôngje di un banc da secônde file le "lipare" di aghe che, in chel, Vitorio al veve apene liberât. Madrac ch'al scozàve, seben pene pene, ancjemò. Un pûc masse pa insegnânte che, molât un grant zigón, a je scampade sul curidôr clamant: "Bidello! Signor direttore! Aiuto!!... presto, accorrete... aiuto! Oh, mamma mia, aiuto!!...". Intant Vitorio, dopo vî butât fûr pal barcon il madrac, al è tornât a sintâsi intal so puest, cussì, conche il so diretôr e bidel e son rivâts in classe, curint, al are dut normâl. I scuelârs ducj zidîns come se nuie al fos zuzidût... ma propi in chel si sint vignî sù da strade: "Incrojable, incrojable, uh, oh!!". E arin li' vôs di doi turiscj franzês che par câs e passavin par lì, restâts "di clap" : no varessin mai imagjinât che di chisti' bândis e plovessin lìparis dal zîl! Chê, daspò vî petât su le ombrene i à colât su le pônte da galossis. Dacôrdo, si è tratât di bravadis fatis di frutàts ch'e an passat i limits, ma, intant che a le mêstre i steve passant le tramarole pal spac 'pene cjapât, il diretôr al veve scomenzât subit a interogâ un a un i fruts par zirî di fâ saltâ fûr il responsabil, ma, nol are stât nissun! Poben, ju à visâts, dât ch'a è cussì us darìn a ducj zinc in condote e, partant, no passarîs nissun. "Tutti bocciati! Avete capito? nessuno verrà promosso! (ben savint che par lez nol è pussibil: ducj colpèvui, nissun colpèvul). Pertanto domani mattina verrete a scuola accompagnati dai genitori!". Il dì daspò (dopo) e an vût il stes risultât. Saben che il dean dal Istitût e paris e maris avessin insistût par savî cui ch'al ere stât, nol è stât nuie ze fâ. Nissun spion. Nol è saltât fûr nissun. Parzè nissun al à viart il "bec"? par paûre di cjapâlis? No. "Pirats" (pirati), "indians" e nemîs, sì; giudeos e viliacs, mai! Une storiàte, chiste, che 'nd à costret le Direzion a mandâ le mestrute a insegnâ inta plui cuiete II a da frutis. Le uniche punizion par chei bulos da IV b al è stât chel di vî, pai ultins doi mês di scuele, un mestri pìzul, brut e trist pardabon: ogni nuie nuie ju cjastiave ben che no mâl parfin pestantju su li' mâns, fin a 15 vôtis, cul tai da rie da stecje di disegn. Lôr le justizie s'a le fasevin dibessôi, i fruts, 'pene le scampanelade di misdì e miez subit lâts jù dai scjalins da scuele. I conts ju rangjavin a sborsàdis, sburz, cul disisi di dut... barùfis tra scuasi ducj i scuelârs, dai pi pìzui fin a chei da cuintis dividûts in doi trops: "indians" cuintri i "pirats". Propi cussì. Il paeson da Basse che si sta cjacarant lu vevin dividût in tre tocs, ma, tanche i zovins da zone trê: i "feroviêrs", e arin neutrai, venastai no bazilavin cun ziarti' nàinis, i "pirats" ch'e arin a stâ dicà dai flums, di simpri, cuissà parzè, e arin nemîs dai "indiâns" ch'e vivevin dilà dai punts. Tant che, tra di lûr, al are dome un pitufâsi, fâsi dispiets, pocâsi e... fâsi daspes vuere tanche chês veris, par interes, come chê scupiade in avost, tal stes an dai fats da IV b. Le mari di duti' li' vueris Le mari di duti' li' vueris, si podares disi, scombatude da zovins fin a sedis-disesiet agns. Spieluts da odulis (allodole) come li' vênditis a premi e son stâts ancje inchê vôte. Une nomenade magnesie, a cui ch'al vares cjatât inta bustute il "dot.Dulcamara", e vares dât par premi nuie di mancul che une Balilla. E a cheâtris furtunâts "numerosi ricchi premi": bizicletis, masanins di cafè e vie elencant. Une sere un frut "indian", oben da zone 1, intal sfueiut da bustine da magnesie ch'al veve comprât al ere scrit: "Complimenti, lei ha vinto un bel pallone". Propi un biel balon par zuiâ di fòbal che, rizivût al istant, cui sie doi amîs, che jerin insieme, e son lâts cjase di corse fasint saltâ un pu' par om chê maravèe. Se nol è, dopo un zent metros s'intòpin in doi "nemîs", valadî da zone 2, che ju an sgambetâts e jal àn robât. E vie di côrse dilà das aghis, intal lûr ream. Si è tratât di un colp di man (e di pîts), sburît tanche un lamp. I aversaris, restâts di clap, tornâts in pîns i an curût daûr fin tal prin punt... parvie che di chê âtre bande i doi pirats e arin za pronts cu li' fiôndis cjariadis. E ju sfidavin: "vignît a cjóissal il balon, s'o vîs coragjo...". "O rivarìn, sì, par fâlu tornâ nestri... nus partèn, a 'nd an ribatût i trê stant dicà, ziart no cumò, ma tra doi dîs... il timp di armâsi avonde ben.". Difat cussì a je stade. Pûc plui di 48 oris daspò (dopo) sul scurî, e son rivâts vot-nûf indians cui arcs e, postâts sul punt dal flum grant, si son mitûts a lanzâ sfrezis (cuestis di ombrene cun in pônte un suro par no riscjâ pardabon di spiulâ, se no sfilzâ i nemîs. Nemîs, in numar tanche cheâtris, e sparavin fiondadis di tocs di zônculis, di gnocs... e ogni tant butâ adalt il balon fasint lâ plui in bestie i indians. Une batae di pûc che, nistès, no à mancjât di procurâ cualchi pâche ai "soldâts" da dôs zonis. Pa gjonde di chei da tiarze zone, i neutrai, chei daspò le firuvie, che però e fasevin il tif pai pirats. Cun chês "cartatucjis" nol podeve zuzedi nuie di grâf al di fûr di... un colp di fionde che i à petât propi sul zarneli a un ziart Santìn che, zênze lamentâsi, al à dit a fuart: "Testa di ferro più dura del ferro!". L'unic inzident capitât daspò une urute di traisi par un fòbal! Une vuere dismitude par mancjanze di... munizions. No par chist finî di lotâsi, ma lant indenant a l'arme blâncje: dâsi sclops e rips, e a butâsi intal flum pìzul (i flums a erin doi). Di lì i gueriers cjaminant, o nadant cuintri curint, daspò vî rot une nasse cun dentri un luz, sistemade 'pene jù da rive, in 7-8 cjapât di smicje une bârcje peade intun vencjâr, e son montâz dêntri saltant plui ch'e podevin fin a spacâ une brèe mandantle a fonz. Po' vie indenant simpri cjaminant e nadant fin tal mulin di F. ch'al masanave cu li' palis fatis zirâ da fuârze das âghis. Lì rivâts i zovins, deventâts furiôs, entrats zênze tantis faturis (però butant jù une puârte), a 'nd an scomanzât a tirâsi pugns di grans di blave e zafàdis di farine di flôr gjavade di un sac ch'e vevin sbregât. Intant doi di lûr, jentrâts dentri intune stalute lì dôngje, a 'nd an jemplât doi candirìns (pentoline) di lat, tirant li' tetis a li' vacjis po', tornâts sul cjamp di batae combatude tra tramogjis (tramogge), drâzs (setacci) e zênglis (cinghie di cuoio), lu an struncjât in muse a un combatènt (rubis di svuarbâlu). Ma nissun al oreve rindisi; nissun al oreve piârdi par il dì dopo sintîsi a disi "viliac". Cui, jo! Ma par nissune rube al mont! Cule prospetive di fâsi ridi daûr e ciot in zîr? Mai! Par chist a fâju dismeti al à pensât il paron dal mulin stes che, visât di ze ch'al steve zuzidint intai sie bens, al è rivât di côrse sul puest cul cjan di cjaze e une sclope a do' canis. Daspò vî tirât un colp par aiar, cjapade le smicje al à sparât le secônde cartatucje al balon dismenteât intun cjanton sot il puartin. Zentrât in plen, i balîns lu an slambrât, e le cause di tant vandalîsim cumò al sameave un cjapiel fruiât. Anzi, a une flosse scùfe di lane vêrde e rosse. Par chel il cjan Pelès, un brac vecjo carampan e miez spelât lât di côrse a cjapâ sù ze che al crodeve al fos stât (un fasan o un crovàt), al è restât avonde mâl. I fantazuts, alore, s'a le son mocàde e Pelès che i coreve daûr... fin conche ti à brincât un pirat pai barghissins e, i ai tirave... tirave... che il frutat al à scugnût gjavâsai e lassâju al cjan. Il vecjo Pelès, stevôte content, menant le code tignintju pai dincj al à partât le prede al so paron. Il frut pirat, restât cun intor dome le smaiute, lât su le rive dal flum al â spietât chei âtris che, daspò il "fisco" cumbinât intal masanadôr, durât un 15-20 minûts, i son lâts daûr scampant (lûr si, ve, cundune bune sbìgule pal baiâ dal cjan e da tonàdis da sclòpe), e lì, ducj insieme, petant un salût si son butâts intal "Corno" nadant fin lì dal prin punt. Lì rivâts e son vignûts fûr da aghe tant nets che mai: zênze pôlvars e farinis sui cjavei e su le piel sudade, zênze balon e... cun nuie intor. Crots dal dut, daspò jessisi disgotâts e vîsi strizât canotieris e barghissutis, si son radunâts inta plazute da Svuìzis, tra i doi flums, distants tra di lûr un 40-50 m., par prometisi di vivi in pâs in avignî e di no riscjâ di procurâsi firidis par stupidézs, se no dibant. Cussì, dit e fat, "piel rossis" e "bandîts di mâr" misclizâts e cjapâts par man formant un grant zêrcli, balant ator dal pâl da lûs, a 'nd an intonât chiste greze specie di cjante-zurament. "O sin zovins, o sin furlans, a fâ i pirats e a jessi indians o vin zuiât cumbinant ancje malans, ma cumò, lu prumitìn, avonde macacàdis, dome di zôcs "serios" o zuiarìn. O sin zovins, zênze fâ nuie no restarìn, inta bombasine e sot li' cotulis da mari malafenò ch'o vivarìn. O sin zovins, o sin (scuasi) oms: vonde monadis e fâ i pantalons. Sì, zovins o sin, ma le figure di pipinòts chê propi no, no fasarin. Zugatolôns, chel si, ma nissun basoâl e nancje cjastrons. O sin zovins galantoms e ognun al sarà leâl zurant culì, tra doi testimonis ...il pâl da lûs e il ferâl!". Un lusurut spandût di une lampadine, si e no di vincj cjandèlis, dal lampion che al vignive impiât prime di gnot che, massime di unviâr, conche pa' fumatonis no si videve nancje di chi a lì, al sirvive pi che âtri une vôte rivâts dôngje a fâ savî indulà che si fos par no cori il riscjo di lâ a finîle dentri intun flum. Ma nistès i à capitât a plui di un di fâ il bagno fûr stagjon. Conclusion Il soreli al ere lât a mont di un biel pûc, e l'astri d'arint, stant lassù, al lùminave le tiare di rifles, mandant l'eterno sflandôr intun zîl neri, dulà che si podevin rimirâ le Orse Majôr e milions di stelis. Ogni tant cualchidune e colave jù dal zîl, tressât daspès dai lamps di calôr intune gnot di leon (come segno zodiacâl). Lamps ch'e visavin che il dì dopo e sares stade un'âtre zornade di canìcule e di un cjaldòn, zênze un fîl di aiar, ch'al faseve sudâ ogni nuie nuie. Sot di un tâl firmament e di un tâl senari naturâl i zovins atôrs, finût di rezitâ l'ultim at come protagoniscj, dopo une vûre di "mandis" ognun al è lât viars le sô zone (indiane o briganz di mâr). Daspò une zornade di emozionantis faturis, apene rivâts cjase si son butâts inta lûr cocjete e, scuasi ducj, a'nd an cjapât sun par durmî tanche agnuluts. Ducj fûr che Adriano stant che i sie gjenitôrs, che za e savevin da bravadis, sintût tornâ dongje, dopo di une bune predicje lu an mandât intal jet cuntun menazôs: "...Po' fasarìn i conts, gardilìn!". Une brute espression ch'e à fat tramâ ancje so nono, dismot e in pinsêr pal nivût. "Spirin che no lu cjastiedin masse, chel frut, al varà ben di capî so pari che i zovins e an di sbrocâsi e spindi un pu' di "energjie mastiche" (cussì si diseve) ch'e an intor. Eh, sì... al suspire l'anzian, beâts lûr ch'e an ancjemò dute le mêl intal cûl!". Virissim. Ma il di daspò e son partidis li' denunziis e i câlcui dai dams a le bârcje che il paron al varà vût di fâ comedâ; e chei dal mulinâr che in pi dai sacs di blave lâts piardûts al à scugnût tignî fer il mulin doi dîs par fâ meti a puest l'implant mitût sotsore cun chel "cuarantevot". Un bon coni di paiâ ch'al sarà dividût par sedis. Le zifre di paiâ parom no ere po' cussì âlte. Par chei ch'e podevin. Une spesone di sgrisulâsi par une famèe come chê di Adriano, ch'e tirave dilunc cun sussidios, di cualchi buride di lui e da bande da femine che, tal viodi il cont, a 'nd à bruntulât: "Ancje chê, cumò! Poben, al urarâ disi nuie buneman par un trê mês al fion! Cussì al impararà!". Triste mari? nol è chel, se no 'nd è no 'nd ai; No si podin inventâ i bezs. Che par Adriano al vares urût disi passâ diviarsis domeniis zênze un "boro" di spindi. Ma pa sô furtune li' fiestis le nonùte, disgropât il fazolet, e tirave fûr doi carantans e i ai dave al "puar ninìn" ch'e si cjoledi il chinoto, che i plaseve tant. Bibite che il zovin al mandave ju planc planc a cane. Chistis impresis e son stadis dome pizulèzis di cjase nestre, di zuguts in agns ormai lontans. Zôcs di chenti di prime da secônde vuere mondiâl che no si fasaran mai plui. Svâgaments e divirtiments da biele stagjon che, seben di pûc ch'e fossin stats (ma cualchi vôte ancje vandalics), e fasin pûr simpri bande da nestre culture, une ministorie sanzurzine (un alc romanzade), dai timps che no erin televisions, compüters, video games e nancje telefonuts. Zuvintût svearine e vivarôse Scuasi dute le zuvintût, chê svearine e vivarôse, e are impegnade in cualchi pratiche. Minzionìn amancul une, anzi dôs. Inta sô stagjon si fasevin li' garis di tufs. Garis di stîl (no fa panzadis), a pic o a slèvare saltant par fâsi viodi da fantatis in zenoglon a lavâ sul lavadôr, e po' nadâ il pi a lunc sotaghe. Li' simpatichis, ma ridiculis sfidis, ma za di timp fûr mode, da domeniis di matine: il cjaminâ cu li' mans e li' simpri acanìdis partidis di fòbal. Chês sì, ve... ch'e arin lotis duris! Sfidis ch'e arin zuiadis cul massim impegn scuasi simpri in zirons a trê: prime zone cuintri le secônde, e po' cuintri le tiârze. Torneos che, saben zuiâts a bon ritmo, ae fin no si vinzeve nuie, al di fûr di coionâsi e di... sperâ di jessi sielts da spurtive che daspes e organizave li' partidis in ziarze di scuviârzi pìzui campions. Tancj nons doventâts famôs e dimôstrin che a le spurtive i veve lade drete. Numinìn amancul un, zênze fâ nons: si tratave propi di un numar "un", valadî un portiêr fenomenâl. Bielzà di conch'al veve apene 14 agns al cjapave pucjissims goi. Saben nol fos stât tant pelôs, cuissâ parzè, al vignive clamât "le sìmie". Ma forsi il non si spieghe par vie che, saltant tanche un simpanzè cui luncs brazs al fermave balons "impussibii" di parâ. Un portieron chist Renzo B. (claminlu cussì), tant al è vêr che al moment just lu an clamât a Udin par fâlu zuiâ inta prime scuadre. Le sozietât zivîl, ancje intai timps ch'o stin cjacarant cumò, si pos disi che, a grandi' liniis, e are dividude in trê fassis, indipendentemêntri da zone che si fos sedi stâts a stâ, e avost al ere il mês plui adat par vignî a cognossi il "tenôr di vite" di une fameje, su le fônde di zemôt si passavin li' zornadis. Eco in ze maniere. I fîs da prime fasse (chei cun plui bêzs, par intindisi), li' zornadis a vignivin gjoldudis insieme cun i lûr gjenitôrs intai miôrs puescj di vilegjature. I scuelârs da fasse trê (valadisi i plui puarez), e vevin "dirit" di jessi mandâts inta colòniis di montagne, o di mâr, a spêsis dal Governo o dal Cumun. I plui disfurtunâts, in chist câs, e arin i frutats ch'e partignìvin a fameis di "miez e miez", no vint vònde palânchis par pudî lâ in cualchi "biel puest". Taiâts fûr dai publics benefìzis e scugnìvin contentâsi di lâ un pâr di vôtis a Spingjon... Conche si dîs di une biele idèe scaturide da cjuze dal Podestât... Il prin zitadìn al veve ordenât di mandâ a Lignan (a chei timps un paisut e cualchi casòn di pescjadôrs), a cjoli un bon numar di camionadis di savalòn e ju à fats struncjâ tra il cjamp spurtîf e le cjase dal Balìla. Cussì cundun pu' di fantasie, fasint fênte di jessi in cualchi riviere, i "restâts" e passavin li' zornadis come s'e fossin stâts a Grau o a Rimini. I plui pìzui fasint cjastiei cule palute e il seglutut, e i plui granduts zuiant di codebuie, fâ garis di salt in lunc, tirâsi savalon. Po' a tâl ore distirâts a cjapâ il soreli. E le aghe? Poben, e are ancje chê. Ziart no salade come chê dal mâr, però cjalde e frede a plasiment: le aghe da dòcis da G.I.L. Insome, stant dutaldì tal soreli, ae fin da stagjon e arin doventâts "neris" tanche chei ch'e vevin stât in âtri' bandis a gjoldi le gjenerose nature, ma cul vantaz che, a le sere, e tornavin a cjase discolzs. In chê vôte dute le frutarie e veve doi pârs di cjalziduris: chês di mari nature e li' zóculis. Li primis e vignivin dopradis a scomenzâ dal prin cliput da primevere fintremai in autun, dal moment che le plante dai pîts e are doventade dure tanche il corean. Invezi li' zóculis li' partavin fintremai che, fruiadis dal dut, e vignivin butadis vie. Se invezi al "paron di cjase" no i levin plui ben, si li' passave al fradi plui pìzul. In famèe al are simpri un fradi plui zovin (o une sôr), intal câs li' meteve le frutàte: li' zóculis e arin "unisex"! Li' zóculis e arin di mode dut il an. Le int ch'e viveve intai cjamps li' dopravin di unviar, cun cjalzis di lane grèze; e di astât, par che no i vignedin li' vissiis, li' dopravin cun cjalzìns di... fen. Dut vêr, ancje se dut chist al dì di vuê al podares sameâ "rube di chel âtri mont"! Però nol va dismenteât di prizisâ che pa domenie ogni un al veve "alc di bon e biel" di meti intai pîs. L'om, zóculis di lusso ben lustris; le femine, un pâr di mulòz di sest; le frute, che i tignive parî bon e jessi braurine, come il frutàt: biei sandui colôr maron. Insome, almancul di chê bande lì, a li' fiestis si are plui contents, ducj: nonos, gjenitôrs e fruts. Novembar 1999

Note ben: Il test al è stât scrit inta lenghe furlane di Sanzòrz.

(1) Grosso insetto peloso provvisto di pungiglione velenoso.
(2) Si muoveva sbattendo la testa sulle pareti di cartone.
(3) È un modo di dire dal significato di: Impietriti dalla sorpresa.
(4) Alla ricerca
(5) Sorta di località balneare che si trova ai bordi della laguna di Marano a sud di Carlino.
(6) Dalla testa