La domenie daspò misdì, a scomençâ de vierte fin inte sierade, venastai fin cuant che nol ven frêt, jo e la mê femine o cjapìn lis bicicletis, lis cjariìn su la machigne e, cun chês pedalant ancje par cualchi ore o lin a visitâ simpri puescj gnûfs. Chest an prin che a scomencin i prins frêts, e cun lûr e passi ancje la voe di pedalâ, o vin fat il solit zîr de domenie e o sin lâts intun puest che culì no spii. Dutcâs, al è in Friûl, chel sì. Nô, par cause de pericolositât dal (simpri) masse trafic o vin miôr pedalâ su stradis secondariis e, ta chê dì, o vevin inbocjade une "strade blancje" che dal paîs si inoltre intal mieç dai cjamps. Di solit intes stradis secondariis si cjàtin pal plui lûcs che a risaltin sicu puescj insiorâts de nature, ma ancje cualchi glesiute plui o mancul antighe. A voltis ancje sôl cjasis o, dutcâs, costruzions cun carateristichis architetonichis di un ciart valôr, daspes stranis e in puescj mancul pensâts. No stoi a specjificâ ce che o vin passât, judût o visitât ta chê dì, ma dutcâs o riten just fâ savê dut ce che si riferìs al sogjet individuât e ficjât dentri inta chest scrit. No lu riten just par vie che, a voltis, par cause di peraulis sclètis, pandudis cun masse naturalèce e precision, a partassin a penalizâ chel puest par vie dai solits individuis armâts di metaldetector, malâts tal cjâf, ma soredut intal côr di chê malatìe multiple che e cjape drenti sintomatologjiis cjamadis di egoisim, menefreghisim, disintares de propie tiere e de propie storie... O varès di zontâ ancjemò des altris agjetîfs, ma o pensi che chei chì, apene doprâts, a bastin. Ma ce tante storie nestre ise mai stade vindude al forest di turni?...1). Pazience che la int di une volte sotane in dut e par dut lu faseve par "Sante Scugne", par fan, par cjapâsi un franc, venastai par integrâ chê mìsare cuindisine che e cjapave e che i servive par mantignî la famèe. Ma tes fameis dal dì di vuê a esistie ancjemò cheste impelente necessitât par scugnî staronzâ la pae doprant espedients dal gjenar? O pensi propit di no! E al è par chel che jo lu dîs, e lu marchi par ben. Alore o rivìn intun puest dulà che, dut lì ator, par colpe des abondantis plois coladis jù dai nûi, chest an plui dal solit sglonfs di aghe, intai cjamps si jodin rudinaçs antîcs e, stant su la strade, si firmìn a cjalâ ...e jo a pensâ. Za fa un pâr di miâr di agns chel puest al jere frecuentât e, a scomençâ d'inchê volte, trope int ae vivût inta chel lûc vuè cussì desolât? Va ben che al è un cjamp coltivât, ma di chel sît e di chê int ce isal restât? No vevi nancje finide la riflession che il mê vuli al jere colât sul ôr dal cjamp, juste a cualchi metri pûc lontan di mê. O vevi notât un "alc" di vert. Cjalant miôr chel cosul vert, piçul, al veve une forme vagamentri umane... un brunzut!? Mitût il pît sul ôr dal cjamp, dongje la fuesse, disore vie su la tiere mote o ai cjapât sù un ogjet che al someave propi a un bronzut roman. Si, al jere evident, ancje se dut sporc di tiere. Lu ai cjapât sù prime che lu cjapedi sù cualchidun altri. O ai vût cûl. Mi soi rindût cont che, cence lâ a cirî, o ai cjatât e salvât des sgrìfignis di chei che lu varessin subit dispiardût, un piçul tesaur che al parten a la storie de nestre int. E no je la prime volte, testemoni al è un altri bronzut mitût in biele mostre intal museu archeologjic di Aquilèe cjatât za fa agns a sant Zorç dai mei fîs Massimiliano e Silvia e debitamentri consegnât ai orghins competents2). Ma inche volte nol esisteve a Sant Zorç un antiquarium!3). Apene a cjase, daspò vêi fatis lis dovudis imediadis azions di pulidure, ancje par capî ce dal diaul che al jere, daspò vêi fatis lis fotografîs, cun dificoltât si à podût dedusi che la figure rapresentade e jere une dee. Ma une "Venere4) o une Diane"?5). Foto n.1Denant: il bronzut apene cjatât ancjemò sporc di tiere (foto L Del Piccolo). Foto n.2Denant: il bronzut daspò lavât (Foto L. Del Piccolo). Di come che la figure feminine e je vistude, anzi disvistude, e sameares a une Venere, la dee romane dal amôr, ma a son di chei che a jodin une Diane, la dee de cjace, par vie di une part metaliche lungje, che e va viars jù e che e podares someâ a ce che al reste di un arc: arme che inchel timp e vignive doprade par lâ a cjace. Secont altris, inveci, chê part lungje e sares une gote di metâl licuit, indurît cuant che, chel, al stave colant jù dal stamp de opare che no jere ancjemò dal dut induride. Il parcè lu jodarìn tra un moment daspò vê sintût un eminent studiôs, e tecnic, che si intaresse di metalurgjie archeologjiche, venastai l'archeometra Evio Vazzoler di Pordenon. Al è di dî, ancje, che la statuùte e je sfodrade di busis tant di someâ cetant roseade des suriis. Intune "roseade" di chês, tant drenti che fûr di une grande buse, inte part basse e in corispundince dal font de schene e des gjambis, la figure e presente une biele pàtine zale. E je cussì biele tant di crodi a une sô doradure, o a che la colade metaliche e sevi stade fate cundun miscliç di ramp e aur. Par dut il rest la sô patine e je verde, colôr che normalmentri al cjape il bronç daspò vê stât par tant timp in contat cui garps agjents chimics de tiere. I agjents garps naturâi de tiere, ma ancje chei dai ledams chimics che i contadins bielza di agns a spandin intai cjamps, par coltâju, a corodin ungrum i metai, ma la ruvine plui grande di chest bronzut e je di sigûr dovude a di un difiet di lavorazion. Daspò di une prime atente, ancje se superficiâl cjalade, difat, in linie di massime il parê che il tecnic archeometra di Pordenon al à dât al è chel chì: "Chest bronzut al è un scart di lavorazion, e par chel al è un grum interessant. Al è tant plui interessant di un bronzut normâl, venastai biel intêr, lavorât e rifinît, parcè che, chel, al podares jessi un bronzut cualsisei, ancje di importazion. Inveci chest, cussì come che al è stât cjatât, si pos stabilî scuasi cun sigurece che al è stât fat sul puest. Si, al pos jessi propi di fabricazion locâl. Al stâ a significâ che lì, ta chel puest, o intun lûc lì dongje, a esisteve une farie adate a la fusion e a la lavorazion dai metâi". La spiegazion di chê patine zale, che no je une doradure, alore si po' dî che e je dovude a une falòpe di lavorazion. E cumò o spieghìn il parcè. Il bronç al è formât di un miscliç di doi metai: ramp e stagn. Tal moment de fusion la misture e à di jessi il plui pussibil compagnade, valadî lis proporzions dai doi metai a àn di jessi adeguadis al ogjet di realizâ6). Tal nestri câs cun dute probabilitât drenti tal amalgame licuit al è stât mitût masse stagn. "Cuant che il stagn al supere il 70% rispiet al ramp -al à dit il tecnic Vazzoler, gjestôr di un studi Foto n.3Daûr: il bronzut apene cjatât ancjemò sporc di tiere (Foto L.Del Piccolo). Foto n.4Daûr: il bronzut daspò lavât (Foto L.Del Piccolo). cun tecnologjis eletronichis e informatichis ungrum avanzadis, dulà che a tratin, analìzin e a restàurin cualsisei materiâl archeologjic di nature metaliche- la leghe che e à formât l'ogjet, daspò di un pûc di timp che e ven a contat cul aiar o cu la tiere, no cjape la carateristiche patine di colôr vert tìpiche de sô ossidazion, ma e dovente di un colôr zâl fuart, tant di vignî confondude cundune doradure". Dut chest parcè che il metal cussì miscliçât no si osside. E cheste ultime considerazion e podares jessi ancje la spiegazion dal parcè che la statuùte no je riusside ben. Il stagn, che al si disfe a une temperadure tant plui basse dal ramp, cuant che al à di disfredâsi, e par consecuence solidificâsi, a i vôl tant plui timp. L'adet a la fusine dinchê volte, sbaliant miscliç, daspò vê lassât passâ un ciart timp, si pense che al vedi crudût che la figure si fos dal dut induride pensant al timp di solidificazion dal ramp che si indurìs prime. Si veve indurît, però, sôl il ramp. La part abondante di stagn, inveci, no si veve ancjemò no solidificade e, partant, cjapât su la figure, il metal cà e là ancjemò licuit al si veve stronfât, rindint cussì la statuùte plene di un mismas di çondars e di sbitùçs di metal che a vevin vanificât la riusside de opare. Cheste singulâr figure di dee in bronç di ete romane, che di sigûr e je di fâ risalî a no plui tart dal tierç secul daspò Crist, e je alte tredis centimetris, largje al massim cuatri e mieç e profonde doi e mieç. Daspò cheste somarie descrizion pseudoteniche, unide a la cronache plui detaiade dal sô cjatament, podaran favorî la soreintindince a fâ un studi plui profont e cualificât par stabilî cun sigurece gnovis teoriis o confermâ chês fin cumò, di nô, bielzà fatis. Daspò vêi fat fâ altris particolârs operazions di restaur e conservazion di bande di int competente, il bronzut al vignarâ catalogât di bande di personâl de Soreintindince. Par finâl si spere che il preziôs repert al vignedi valorizât metintlu in biele mostre intal "antiquarium" de nestre associazion, locâl che al è stât adatât e mitût a nestre disposizion de bande de Aministrazion Comunâl sanzurzine, intal stabil di sô proprietât cussì clamât "ex GIL" di Sant Zorç di Noiâr. Vigji Dal Piçul - Luigi Del Piccolo Note ben: Test scrit il lenghe furlane normalizade. Bibliografie P.CASSOLA GUIDA, I bronzetti friulani a figura umana, L'Erma di Bretschneider, Roma 2000. C.A.DI STEFANO, Bronzetti figurati nel museo di Palermo, L'Erma di Bretschneider, Roma 2000. A.A., Da Aquileia a Venezia, Garzanti - Scheiwiller, Milano 1986. B.M.SCARFÌ-M.TOMBOLANI, Altino preromana e Romana, Comune di Quarto D'Altino, A.A., Enciclopedia Universo, Istituto Geografico De Agostini (NO), Novara 1974. A.A., Aquileia Nostra, Associazione Nazionale per Aquileia, Aquileia (varie annate). I.AHUMADA SILVA - A.TESTA (a cura di), L'antiquarium di Tesis di Vivaro, Comunità Montana Cellina-Meduna, Maniago (PN), 1991. Museo di Concordia, ecc. (da completare). Ercolano La città sepolta, V.Carcavallo, Napoli 1983. CORDELLO, Ostia, guida agli scavi, D.Edi.T., Roma 1994. W.JOHANNOWKY, Paestum, documenti d'arte, Istituto Geografico De Agostini, Novara 1982. G.Magi, Tutta Pompei, Bonechi Editore, Firenze.