Cui che al ves voe di capî un dret sul intrîc dai "comunâi" e des "comugnis" dai paîs che cumò a son sot il comun di Sant Zorç, al vares un biel cefâ a distrigâsi fra lis cjartis di cetancj archivis. Miôr partî di un ripoi sigûr, che al è un catastic metût adun di Guglielmo Buglioni intal 1681 e che orepresint al è vuardât tal Archivio Storico Provinciale di Gurice(1). Si trate di un document no masse cognossût, ma che dutcâs al è stât innomenât, za timp, ancje su chestis pagjinis(2). Il cadastri al jere stât inmaneât dal pirît par comant dai princips Eggenberg, sorestants de contee, che a volevin cognossi la consistence e il valôr di ducj i "comunâi", par podêju vendi, come che si veve bielzà scomençât a fâ, aromai di un biel toc di timp, seial sot l'imperi, seial sot Vignesie(3). Buglioni, par chest teritori, al ten cont nome dai paîs di Sant Zorç, Cjarisà e Vilegnove, par vie che nome chesç tre paîs a jerin constituîts in "comun", venastai che si riunivin in vicinie, pe part de contee di Gardiscje. Difat il paîs di Noiâr al faseve part dal comun di Sant Zorç; chel di Ziline al veve cuatri cjasis, simpri sot Sant Zorç e chel di Çucule al jere in sotanance di Vignesie. Par jù, invecit, il document al mostre i terens fin in marine par vie che, come che o savês, il nestri comun al à piardût chest slac nome dal 1940, cuant che al è stât constituît il comun di Torviscosa. Nome cjalant di buride lis mapis dal document, si capissin distrade dôs robis. Prime di dut si viôt che, ancjemò ae fin dal sîscent, lis tiaris comunâls a cjapavin plui di mieç teritori. La seconde robe che e salte fûr e je che chescj terens a jerin ducj lontans dai paîs. Chestis dôs considerazions no vàlin nome pes nestris vilis ma a son normâls. Difat, in che ete lis venditis di fuarce dai comunâi a jerin malafessì scomençadis zaromai di plui di un secul, ma no vevin implicât la piardite di grancj slacs. Podopo al va dit che i terens comunâi a jerin, di dutis lis tiaris, chês di cualitât plui scjarse, sicheduncje a stavin lontan dal paîs, propite par vie che i paîs a vignivin tirâts sù là che i terens a jerin miôrs. Ancjemò une robute, che jentre pôc cun chest discors di comunâi, ma dutcâs interessante, e salte fûr dai disens. Come che o podês viodi, il sît di Cjarisâ al va atôr atôr di chel di Vilegnove e si ferme nome sul Cuar, di sore e di sot di chel paisut. Jo o sbaliarai, ma o pensi propite che cheste vile e sedi nassude unevore tart, mangjant il teritori che prime al jere dut di Cjarisà. Il nom stes di "Vilegnove" al somee che al voledi dâmi reson. Tornant a Sant Zorç, o viodìn che i soi comunâi, cun 2285 cjamps, a vevin une des plui grandis estensions, superadis, tal dulintôr, nome di chei di Gonârs e di Prissinìns. La schirie dai vot terens e je, dutcâs, folcjade su cuatri zonis: chest al ûl dî, forsit, che pûr stant sul ôr dal teritori, pai motîfs che o ài bielzà inlustrâts, lis lôr origjinis a son disferentis l'une di chê altre. Dal sigûr nol è câs di capî, cun lis cjartis, cemût che a son nassûts ducj chescj comunâi, stant che, come che o varês capît leint il saç di D.Navarria, cualchidun al podares jessi nassût fintremai in ete preromane. Dutcâs alc di interessant al ven fûr furigant intai lôr noms. Il numar 4, metipen, si clame Bando Maggiore e chest al podares, salacôr, volê dî che, par vieri, al jere riservât a cualchidun, postâi al Cjapitul di Aquilee, che al jere il sorestant dal paîs fintremai dal 1031. Podopo, chê grande largjure dulinvie il Cuar e fin su la marine, che di bessole e cjapave mieçs comunâi, e meteve adun dôs piçules tiares cul grant Paludo dal Quar. Sicheduncje, tal disore, al jere un piçul comunâl clamât Sacîl, inmò tignût a bosc, che, dal sigûr, al jere par vieri dutun cul Bosco Sacil di Cjarlins: venastai un grant sît boschîf, che al leve dal Cuar fintremai ae roe Ziline e ancje oltri. Tal Paludo dal Quar o cjatìn doi toponims unevore vieris: Coluna e Chiamana a son difat di origjine romane; il prim al diven dal latin "colunea" (colonie), biel che il secont al è un prediâl. Dut chest, seial par vie dal Bosco Sacil, che par vie di chescj doi noms romans, che si cjàtin sul comun di Cjarlins, parie che su chel di Sant Zorç, al ûl dî che, par antîc, i teritoris a jerin dutun. Lant invecit sul sît pandût al numar 1, o leìn che ancje la int di Pampalune, di Morsan e di Puçui e veve disore i soi dirits: venastâi che, plui che un comunâl, al jere une comugne. Dutcâs, stant che i tre paîs innomenâts a stavin sot Vignesie, al è clâr che chescj dirits a jerin unevore vieris, nassûts dal sigûr prin dal Cincent. Un ultim, piçul sît comunâl, in schirie cul numar 3 e cul numar 7, al sta invecit apene disot Ziline e dilunc la roe. Forsit cheste sô posizion e à zovât pe incressite dal piçul paisut di Ziline che, dal sigûr, al è nassût par vie dal incuintri de roe cu la strade che di Sant Zorç e mene a Tisane, strade unevore viere, fate inmò dai romans. Cumò o passìn invecit il Cuar e o lin a soreli jevât, a Cjarisà e a Vilegnove. Cjarisà al veve, ancje lui, la sô biele part di comunâi: si trate di une lungje strisse, fate a lame di runcee, metude dilunc il Zumiel. Scomençant di disore e lant in jù, si cjàtin tiaris simpri plui paludosis, fin a chê che e puarte il numar 3, là che e leve a fâ fen ancje la int dai paîs di Gonârs, Vilegnove e Porpêt. Par antîc, almancul fin ai prims dal Votcent, al veve di jessi un grant bosc, stant che i noms dal dulintôr a ricuàrdin ancjiemò propite boscs, salacôr bielzà taiâts: Bosco Bando Zumello, Selvamonda, Fratta, Ronchi di Sass, Olmarie, Bando(4). Il bosc dal Zumiel, paraltri, che al leve di une bande a chê altre de roe, al fò causion, dal 1296, di une barufe fra la int di Cjarisà e Vilegnove di une bande e chê di Aquilee di chê altre(5). I comunâi di Vilegnove, che o vin za nomenâts come Ronchi di Sass, a jerin tacâts di chel dal numar 3 di Cjarisà e, su ducj i comunâi di chest e veve dirits la int di Vilegnove. Chest nus dà inmò plui reson cuant che o disìn che il teritori di Vilegnove al è nassût, distacantsi di chel di Cjarisà. Ae fin bisugne zontâ che chei di Vilegnove e Cjarisà a levin a fâ fen e altri tai prâts e tai boscs dal Majò a Favuîs e tal Pradiceu a Gonârs. Çucule e veve dôs comugnis tai terens che a stavin disore, bande Porpêt e ju doprave insiemit propite cu la int di chel paîs. Par vieri, une di chês dôs comugnis, chê metude plui a mont soreli, e jere dutun cun comugnis di Porpêt, stant che su chel comun o cjatìn i toponims Promiscolo, che al è clâr, e Boscat che, scuasit dal sigûr, al jere comunâl. Par siarâ chel discors sui comunâi o podìn dî che une robe pluitost strambe e je saltade fûr. Dutis lis vilis a vevin plui o mancul dirits sui comunâi e su lis comugnis di altris paîs, ancje lontans: chel de int di Puçui, che e vignive fin a Sant Zorç, al è propite un biel esempli. Cussì o viodìn che chei di Vilegnove e Cjarisà a levin a Favuîs e a Gonârs, chei di Porpêt a vignivin a Çucule e vie indenant. Poben, o varês vût mût di capî che chei di Sant Zorç no vevin dirits su terens di altris paîs. Forsite, furigant miôr in cetantis cjartis sparniçadis atôr pai archivis, o varin mût di discuvierzi che no je cussì. Ma se cussì e ves di jessi al sares propite un biel intrîc; un intrîc dificil di capî e di motivâ.

Setembar 2000